香港新浪網 MySinaBlog
andrew | 29th Oct 2006, 4:56 AM | 有感, 博客

開 blog 快一年了,寫下寫下,竟然寫到200!正好做點統計。
Picture

自覺寫blog 的心態在這一年間變了很多。記得一年前,成日都寫,真是日日寫,但,這種行為是不能持久的,每天怎可能花半小時至一小時寫blog,所以無可避免地,一月份從高位狂瀉。以後發生的事,大家都能從上圖看到,我也無謂多咀了。

寫到中期,第二種感慨是,很多和我同期出道的 blogger ,都無聲地退出了。突然發現,blog 友不是一生一世的。

然後是,自己變得越來越少看blog ,少留言,可以想像,來這個blog 的朋友越來越少了。舊朋友退出了,沒有新朋友加入,進入這個blog 的,大部份都是從 yahoo 和 google 而來的。

與此同時,發現自己寫得越來越雜。我覺得寫blog 最好要專一點,寫政治就只政治,電影就只電影,才有凝聚力。有考慮過把內容分開另一個 blog 來寫,可能會認識到更多志同道合的人。

這個blog 曾經有不少的過客,都是一段時間出現,以後就消失了。可能還有時會來,可能以後也不會再來了,不知道。

另一個改變,是我打全文放了出來,不用在點進來閱讀全文。這個是將心比心。我喜歡用 bloglines,不用到網站就能看到所有文章。

前幾天方潤來留言,才驚覺以前一篇文章能有八十多個留言,現在能過十已經可以貼堂了。不過寫到這個時候,都看化了,留言多也不一定代表什麼,有時只是禮尚往來,不一定是對這那篇野有什麼 feeling。

現在寫 blog 的心態,不過是寄望把自己胡思亂想的「偉論」分享一下,能有知音人有共鳴,就心滿意足了。

講開又講,我喜歡看的 blog ,都是有自己思想的文字,不只是拾人牙慧,或轉載資訊的。這個世界知識是無限,但真正獨立思考的靈魂不多,能思考出智慧的更少。大多數人的問題,包括我自己,是在一個固有的規範下思考而不自覺,就如同戴著有色眼鏡看事物,只能看到同一種顏色。看到很多人把自己的想法當成真理的程度,令我汗顏,不明白那只不過是眾多不能確定的假設下所得的結論,的其中一種吧。

扯遠了,這第200帖。


andrew | 27th Oct 2006, 3:31 AM | 文化, 電影, 信仰

1. 《迷幻沙灘》

在流行文化中,基督教可以話去到無孔不入的地步。里安納度主演的那套《迷幻沙灘》(The Beach),好耐以前啦,第一次看時,覺得很爛。最近電視重播,又再睇一次,今次又覺得 ok 喎,而且原來裡面有好有符號意義的東西,不過有些就一定要對基督教有些認識才會睇得出。

例如里安納度為左隱藏那個只有幾十人的世外桃園,唔想再有人加入,佢就引那班想探尋這個世外桃園的朋友到附近的大麻農場,然後將假手於農場的保安把佢地全部殺死。朋友在他面前應鎗聲倒下,濺得他滿面鮮血。眼睜睜看著朋友被殺,他或許有點內疚,回到世外桃園的路上,要跳下一個小瀑布,從水裡上來,鮮血都洗乾淨了,他又可以若無其事地回到世外桃園生活。跳下瀑布代表什麼呢?基督教裡的受浸禮。

居住在迷幻沙灘的人們,不用過城市公式化的生活,每天打打球,捕漁,做飯,每天都開懷歡笑。這個社群和基督教有沒有關係,就不得而知了。但結局很有寓言味道。

2. 《夜宴》

講到近期爛片,莫過於馮小剛的《夜宴》。電影都是辛苦拍出來的,無論如果都會有點可觀性,講真,都好難為「爛片」下定義,就當是主觀感受吧。

在美術方面不算爛,但我總不明白為何中國導演要拍「巨著」,總是以古代武裝電影做主題。說是賣到外國,我諗不少觀眾更有興趣民生的體材。因為全球化的優勢,中國現在經歷的可以說是人類史上最快最成功的經濟進展,當中有多少平凡人的故事,從鄉間走到城市,在社會變遷中流離、渴望、迷失、醒悟。其實這類電影也有不少,前排還有一套得了什麼獎,但都是拍得很真實那種藝術電影,如果加上商業電影的美感,故事性,也不失為一個好好的方向。不過,這種電影在政治上或許比較敏感,拍大陸差的一面,唔容易過關,沒有古裝片安全。

聽說中國古裝片的女角開胸越來越低,直逼西方的維多利亞時代。我沒有能力考究,不知五代十國時婦女是否都這個模樣,不過作點美術修飾倒是沒有什麼所謂,畢竟這是電影,不是紀錄片或教育電視。

說回正題,此片之爛,不是在於美術、攝影等技術層次,而是在於劇情是如此的軟弱無力。角色都很薄弱空洞,最後好不容易到了「夜宴」,心想有點劇力了,不料導演立刻來個反高潮,馬馬虎虎,完得完全不合邏輯。我想導演想表演宮庭最毒的「人心」,不過對我來說,不是表達得很好,不是很震撼。


andrew | 21st Oct 2006, 9:17 AM | 經濟

久唔久就會有新的商業理論出理,每個聽起來都好合理,但係好多時當做聖經就一定死!例如90年代的 synergy,引發公司合併潮,係又合唔係又合,結果好多公司因為這樣而倒閉。又如2000年的 internet bubble,大家齊齊上網燒銀紙。但大家又唔好誤會,合併有時,的確可以提高效率;而 Tower Record 更是因為不願意把業務網絡化而倒閉。

Blockbuster:傳統的店舖式租碟公司。 Netflix:網上租碟公司,以郵寄方式交收。 iTV: Apple 的大想頭, video on demand,在電腦單撈隻碟再發送去電影。

Blockbuster 的利潤係傳統方式的,集中在最新發行的 DVD ,因為上架的費用,Blockbuster 在店內只能提供比較受歡迎的電影。

Netflix 的利潤是典型的長尾巴,利潤分佈由 big hit 到好偏門的電影都有。佢地租出小眾 DVD 的邊際利潤,比最新的DVD 為多。因為小眾 DVD 需求少,存貨唔洗咁多,客人又長租長有。另外,除左搜尋上的方便外,Netflix 仲有一個殺著:社群。好多人寫碟評,相同興趣的人互相推薦心水電影,令小眾電影的售出量增加。難怪最近 Netflix 發出一百萬美元獎金,徵求一個更好的推薦系統。

Web 2.0 著重用戶交流,但能因此賺錢的公司不多,相信 Netflix 出租 DVD 是個很好的例子:在網上建立了一個社群,本來是一人租一隻,現在你推介我,我推介你,大家都租了兩隻,滿足還感更高。在這個年代,廣告宣傳的作用慢慢淡化,同輩之間的推薦才是正路。現在買電子產品,有誰不先去討論區新聞組聽聽用戶的評價才買?那怕一般用戶可能不專業,我地都係信網上個阿水多過信廣告。

在技術優勢上,Netflix > Blockbuster,好明顯。

Steve Jobs 上個月透露了 iTV,佢話係電腦同電視之間的 "missing link"。 iTV 其實只是個 wifi 盒子,把電腦的影像傳送到電視。在技術上好多公司都能做。但只有 Apple 做得到的,除左個 style 之外 (拿,呢個係 Apple 的殺著,點解 iPod 咁好賣?點解用Apple 好似高人一等?Intangible asset:品牌也),就係在於內容供應方面。 iTV現在已經同 Disney 有合約,可以 download Disney的所有電腦,例如《加勒比海盜》等。 Steve Jobs 介紹 iTV時,個介面係用 remote 從電視選電影,雖然都係一貫地好型,但係呢個介面的缺點,就係唔能夠好好利用好似 Netflix 的網上社群互相推介的效應。iTV 在技術層面上比 Netflix 優勝:幾新的DVD 都可以無限 download,唔會好似Netflix 同blockbuster 咁冇貨就租唔到。想睇乜即時就有,方便好多,唔洗落街租碟,又唔洗等一兩日,鼓勵 impulsive buying。如果可以再運用Web 2.0 的長尾巴效應,模式上的優勢為:iTV>Netflix > Blockbuster。


andrew | 16th Oct 2006, 6:14 AM | 經濟

著名的科技雜誌 Wired 雜誌編輯 Chris Anderson 今年出左本書,叫《長尾巴》(The Long Tail),可以在他的Blog 免費看 Chapter 1。

其實個道理好簡單,睇左少少已經知佢想講乜。

傳統商品銷售行業有 80-20 定律:80%的盈利出現在 20% 的產品銷售上。所以傳統的銷售模式好依賴 Big hit,如紅歌星的新唱片、新上市的 DVD、新上畫的電影,要配合強勁的宣傳催谷,把盈利集中在小數產品上,得就發,唔得就撻。因此造就左好多天皇巨星、bestseller 書和DVD。

但係到左數位時代,係 internet 開間公司,由於搜索技術的進步,以及唔須要將產品「上架」的費用,即使小眾的書、電影都可以照賣,變得公司的盈利唔再係集中於小數的產品。以網上 mp3 為例,在每一季,95%的專輯都有最少一首歌被購買下載。而最正既係,呢 d 舊歌、小眾興趣的成本價往往比 big hits 低,所以售賣呢 d 產品的邊際利潤比最新產品高好多。

網上賣書的Amazon、網上租 DVD 的 Netflix 、以及賣廣告的 Google,都受惠於這個現像,令呢d 公司可以踏入從前未開啟的小眾市場。

呢個現像都好美國文化下,因為美國講 individuality,10個人有11個不同的興趣。有人講過美國文化係無「潮流」呢回事,雖然係誇張左 d ,不過佢地的確係冇亞洲國家咁依賴潮流,唔潮就係罪行。

好自然的問題係,「長尾巴」係香港大陸台灣成唔成立呢?我地的消閑文化裡面,係咪好似美國咁由好多個唔同既「特殊興趣」小組組成?又好似少 d 喎。係香港,如果你太有個性,話比人聽你鐘意 d 非主流既玩意,人地咪覺得你扮野。不過,呢個都係我吹水,係無 data 之前,都係唔好咁快下定論。


andrew | 14th Oct 2006, 5:03 AM | 中國

久不久就會聽到一 d 歧視的小故事。

1. 吐痰

呢到的牙醫比較特別,係無個水杯比你漱口,而係用一條管係你個口到噴水,另一條管係到吸番,仲可以係整牙時吸埋口水。話說有個中國學生去牙醫診所睇牙,整完牙後有 d 流血,就往垃圾桶到吐痰。個牙醫見到,就話:「你地中國人成日都吐痰喎。」果個中國學生就好生氣,但係因為牙仲係痛緊,就含恨咁走左,冇博番佢。

其實我都唔知呢單算唔算係歧視,如果發生係我身上,我都唔為意呢個係 stereotyping ,最多認為個牙醫比較好奇,所以咁問。

2.電影

Mission Impossible 3 係在上海拍,有時拍到上海人將衫浪出去屋外晒,唔係咁好睇,於是又有人話呢套電影係醜化中國大陸....但係我又睇都上海好多高樓大廈,好繁榮咁,真係大家睇到既野唔係好同。

Crash 入面有一幕影一個亞洲人偷運人蛇,其實唔知係咪中國人,只係最後係 China Town 放低佢地。於是又有人話係辱華電影....

3. 主觀

歧視呢樣野,真係好主觀,但係我諗某程度上反映左個人對民族的自信心,以及人在外地過得爽不爽。如果成日都覺得好委屈咁,就好易感受到歧視。

4. 中國人

上個月,大陸網易有個名為「如果有來世,想不想當中國人?」的投票。結果六成幾的人都話唔想。當然,呢 d 破壞「和諧社會」的投票,好快就比人禁左,而有兩位編輯被炒魷魚。

我諗最痛苦的係,連投下票表達下不滿的權利同尊嚴都冇


Next